archivemay day

Article

மே தினம்: வேலை நேரம் குறையுமா..? – எஸ்.விஜயன்

இந்தத் தலைப்பையொட்டி கடந்த 130 ஆண்டுகளில் லட்சக்கணக்கான எழுத்தாளர்கள் லட்சக்கணக்கான பக்கங்களில் எழுதிக் குவித்துவிட்டனர். எனினும் இது முழுமையடைவில்லை. இது இந்த சமூக அமைப்பு இருக்கும்வரை முழுமையடைவும் செய்யாது. இன்னொருபுறம் இதை ஒரு வன்முறைச் சம்பவம் என்று சித்தரித்து இன்னொரு இணையான வரலாறும் கட்டமைக்கப்பட்டிருக்கிறது.

இதுவும் இந்த சமூக அமைப்பு இருக்கும்வரை நீடிக்கும். புதிய சமூக அமைப்பு தோன்றும்போதுதான் மேதினம் பற்றிய எழுத்துக்கள் முற்றுப்பெறும், கட்டமைக்கப்பட்ட வரலாறும் அழிந்துபடும். அதன்பிறகு மேதினம் மனிதகுலத்தில் நடைபெற்ற நீண்ட நெடிய வர்க்கப் போராட்டத்தில் ஒரு மைல்கல்லாக என்றுமே நிலைத்திருக்கும். இப்போது இருக்கும் முதலாளித்துவ சமூக அமைப்பும், அதற்கு அடித்தளமாக இருக்கும் முதலாளித்துவ உற்பத்தியமைப்பு முறையும், அதன் அச்சாணியாக கூலியுழைப்பை சுரண்டும் மூலதனத்தின் இயக்கமும் முற்றுப்பெறுவதையே புதிய சமூக அமைப்பின் தோற்றம் என்று குறிப்பிடுகிறேன்.

பண பரிவர்த்தனமும் மூலதனம்:

இயல்பாகவும், இட்டுக்கட்டியும் நடைபெறும் நிகழ்வுகளை பாகுபடுத்தி அறியும் ஆற்றலை மார்க்சியம் நமக்கு வழங்குகிறது. மானுட நாகரீக வரலாற்றில் முதலாளித்துவம் தோன்றியது ஒரு இயல்பான நிகழ்வுப்போக்கு அது சிலருடைய சதியின் விளைவாகத் தோன்றியது என்று மார்க்சியம் கூறவில்லை. அதேபோல் முதலாளிகளின் தோற்றத்தையும் அவர்களின் பூர்வஜென்மப் புண்ணியம் என்றோ அவர்களின் சிக்கண நடவடிக்கையாலும் கடின உழைப்பாலும் விளைந்தது என்பதையும் மார்க்சியம் நிராகரிக்கிறது. பரிவர்த்தனைகளின் போது மதிப்புக் கூட்டல் நடைபெற வாய்ப்பில்லை என்பதும் உற்பத்தி நிகழ்முறையிலேயே மதிப்புக் கூட்டல் நடைபெறுகிறது என்பதையும் பரிவர்த்தனைகளையே தொழிலாகக் கொண்டிருந்த வணிக முதலாளிகள் ஒருகட்டத்தில் உணர்ந்து கொண்டார்கள்.

அவர்களிடம் இருக்கும் பணத்தை பெருக்குவது என்பது அதை மூலதனமாக மாற்றி உற்பத்தியில் ஈடுபடுத்துவதன் மூலம் மட்டுமே சாத்தியம் என்பதையும் உணர்ந்து கொண்டார்கள். இந்தப் போக்கில் உற்பத்தி நிகழ்முறையும், பரிவர்த்தனைக்காக நடைபெறும் சரக்கு உற்பத்தி நிகழ் முறையாக மாறுகிறது. சரக்கு உற்பத்தி முறையே முதலாளித்துவ உற்பத்திமுறை என்கிறோம். சரக்கு உற்பத்தியில் இயற்கையாக கிடைக்கும் கச்சாப் பொருளோ அல்லது ஏதேனும் ஒரு வகையில் மனித உழைப்பு செலுத்தப்பட்டு பூர்த்தியாகாத பண்டமோ சரக்குகளாக உற்பத்திதளத்திற்குள் வரவேண்டும். அத்துடன் அதை மேலும் மற்றொரு சரக்காக மாற்றும் வல்லமைபடைத்த மனிதர்கள், அதாவது தொழிலாளிகள் அதன் மீது வினைபுரிவதால் புதிய சரக்கு படைக்கப்படுகிறது. இப்புதிய சரக்கின் மதிப்பானது உற்பத்தி தளத்தின் ஊள்ளீடாக வந்த சரக்குகளின், குறிப்பாக சரக்காக வரும் தொழிலாளியின் உழைப்புச் சக்தி உள்ளிட்ட அனைத்தின் மொத்த மதிப்பைவிட அதிகமாக இருக்கும்.

Private banks to charge upto Rs 150 for cash transactions

இந்த அதிக மதிப்பு என்பது உபரி மதிப்பாகும். இது முதலாளிக்கு சொந்தமாகிவிடுகிறது. இந்த உபரி மதிப்பானது, உபரி உழைப்பிலிருந்து பிறக்கிறது. உபரி உழைப்பு என்று கூறும் போது, அவசிய உழைப்பு ஒன்று இருக்க வேண்டுமே என்ற கேள்வி எழுகிறது. ஆம், அவசிய உழைப்பு என்ற ஒன்று உண்டு – அது உழைப்பு நிகழ்முறையில் தொழிலாளி இழக்கும் சக்தியை மீட்டெடுக்க நுகரப்படும் சரக்குகளின் மதிப்பாகும். இதைத்தான் உழைப்புச்சக்தியாக முதலாளிக்கு பரிமாறிக் கொண்டு அதற்கு ஈடாக கூலி என்ற மதிப்பை தொழிலாளி பெற்றான்.  இதுவே கச்சாப் பொருட்கள் உள்ளிட்ட சரக்குகளுடன் உற்பத்தி தளத்திற்குள் உள்ளீடாக வந்த உழைப்பு சக்தி என்ற மதிப்பாகும். ஆக தொழிலாளியின் அவசிய உழைப்பும், உபரி உழைப்பும் சேர்ந்ததே வேலை நாளாகும்.

இதில் உபரி உழைப்பு மூலதனத்திற்குச் சொந்தமாவதால் வேலை நேரத்தை எவ்வளவு நீட்டிக்க முடியுமோ அவ்வளவு நீட்டிக்க தற்பெருக்க தாகம் கொண்ட மூலதனம் முயற்சிக்கும். அதே போல் வேலை நாளை அவசிய உழைப்புடன் முடித்துக் கொள்ள கூலியுழைப்பு முயற்சிக்கும் இந்த இருபெரும் சக்திகளுக்கிடையேயான தள்ளுமுள்ளுவில் எந்த கட்டத்தில் எந்த சக்தியின் கை ஓங்கியிருக்கிறதோ அதற்குத் தகுந்தாற்போல் அந்தக்கட்டத்தில் தீர்மானிக்கப்படுவதுவே வேலைநாள். இப்படி வேலைநாளை தீர்மானிப்பதற்கான நடைபெற்றுவரும் வர்க்கப் போராட்டத்தில் ஒரு மைல்கல்லாக மேதினம் திகழ்கிறது.

பணமதிப்பு நீக்கம் யாருக்காக ...

பரிவர்த்தனைகள் இயல்பாகவே சமமதிப்புள்ளவைகளுக்குகிடையே நடைபெறும் நிகழ்வாகும். நாம் கடையில் சென்று 500 ரூபாய் நோட்டிற்கு ஈடாக ஐந்து நூறு ரூபாய் நோட்டுகளாக சில்லரை பெறும் போது எப்படி பரிவர்த்தனை செய்கிறோமோ அப்படித்தான். இங்கே நோட்டுகள் என்பது வெளிப்படையாகவும் அவற்றின் மதிப்பு ஒவ்வொன்றின் மீது வெளிப்படையாக பொறிக்கப்பட்டிருப்பதாலும் நமக்கு இந்த சமதைகளின் பரிவர்த்தனையை எளிதில் புரிந்து கொள்ள முடிகிறது. சமமதிப்பற்றவைகளுக்கு இடையே பரிவர்த்தனை நடைபெற்றாலும் அது நீடித்த பரிவர்த்தனைகளாக இருக்க முடியாது.

முதலாளித்துவ சமூக அமைப்பில் உழைப்பு:

முதலாளித்துவ சமூக அமைப்பில் உழைப்பு சக்தியானது ஒரு சரக்கு என்ற அளவில் சந்தைக்கு பரிவர்த்தனைக்காக வருகிறது. உழைப்புச் சக்தியை தாங்கி நிற்கும் தொழிலாளிக்கு அதை விற்று அல்லது பரிவர்த்தனை செய்து அதற்கு ஈடாக கிடைக்கும் மதிப்பை வைத்து தன்னை மறுஉற்பத்தி செய்து கொள்வதைத்தவிர வேறு வழியில்லை என்ற நிலை ஏற்பட்டதால்தான் தன்னுடைய உழைப்புச் சக்தியை விற்க சந்தைக்கு வருகிறான். இதுதான் முதலாளித்துவ உற்பத்தியமைப்புமுறையின் தோற்றமாகும். அதேபோல் பரிவர்த்தனை என்று வந்துவிட்டால் அது சமதைகளின் பரிவர்த்தனைகளாகவே இருக்க வேண்டும். எனவே உழைப்புச் சக்தியை அதன் சமதையான கூலிக்கு தொழிலாளி விற்கிறான்.

ஒரு சரக்கை சமதை கொடுத்து பரிமாறிக் கொண்ட எவரும் அதன் பயன்மதிப்பை முற்றாக நுகரத் துடிப்பதுபோல் முதலாளியும் உழைப்புச் சக்தியின் பயன்மதிப்பை முற்றாக நுகர முயல்கிறான். மற்ற சரக்குகளை அளவுவழியில் அளவிடுவதுபோல் உழைப்புச் சக்தியை அளவுவழியில் எவ்வாறு அளவிடுவது? அது உற்பத்தியாவதற்கு செலவிடப்படும் நேரத்தை வைத்துதான் உழைப்புச் சக்தியை அளவிட முடியும். முதலாளி உழைப்புச் சக்தியை நுகரும் போது அதற்கு சமதையாக கொடுத்த கூலியின் அளவை மறுஉற்பத்தி செய்வதுடன் பரிவர்த்தனை முற்றுப்பெறுகிறது.

child labor laws!!!!

ஆனால் முதலாளியோ உழைப்புச் சக்தியை வாங்கியதை உழைப்பை ஒரு நாள் அளவிற்கு வாங்கியிருக்கிறேன் என்றும் அதை நாள் முழுவதும் பயன்படுத்தும் உரிமை தனக்குண்டு என்று வாதிடுகிறான். நாள் என்பதை எப்படி வரையறுப்பது? முதலாளியைப் பொறுத்தவரை தொழிலாளி உண்டு, உறங்கும் நேரம் தவிர மற்ற எல்லா நேரமும் தனக்குச் சொந்தமானது என்று வாதிடுகிறான். ஆகவே முதலாளித்துவத்தின் தோற்ற காலத்தில் வேலை நாள் என்பது 18மணி நேரமாக இருந்தது. விலைகொடுத்து வாங்கியவர் என்ற வகையில் அதன் பயன்மதிப்பு முழுவதையும் நுகரும் உரிமை முதலாளிக்குண்டு. அவரது உரிமையை எப்போதும் நிலைநாட்ட முயல்வார்.

அதேபோல் கூலி என்பது தனது மறுஉற்பத்திக்கு தேவையான சரக்குகளிள் மதிப்பென்றும் அத்தகைய மதிப்பை படைத்த மறுகணமே நமது பரிமாற்றல் உடன்பாடு முற்றுப்பெறுகிறது. எனவே கூலியைப் பெற்றுக் கொண்டு ஆலையை விட்டு வெளியேறும் உரிமை தனக்குண்டு என்று தொழிலாளி வாதிடுகிறார். இந்த இரு உரிமைகோரலுக்கு இடையிலான போராட்டம் அவரவர் தரப்பினரை இணைத்துக்கொண்டு நடைபெறும் போராட்டமாக வடிவெடுத்து அது முதலாளி வர்க்கத்திற்கும் தொழிலாளி வர்க்கத்துக்கும் இடையிலான போராட்டமாக பரிணமிக்கிறது. இப்போராட்டமானது இந்த உற்பத்தி நிகழ்முறையின் ஊடாக கண்ணுக்குத் தெரியாத அடிநீரோட்டமாகவும் சில நேரங்களில் கண்ணுக்குத் தெரியும் வெளிப்படையான போராட்டமாகவும் நடைபெற்று வருகிறது.

பயன்மதிப்புக்கும், பரிவர்த்தனை மதிப்புக்கும் இடையிலான முரண்பாடே இத்தகையதோர் நிலையை ஏற்படுத்திவிட்டது. குறிப்பாக உழைப்பு சக்தி பரிவர்த்தனையில் இரு உரிமை கோரல்களை ஏற்படுத்திவிட்டது. இதன்விளைவாக சமதைவிதி அமலாவதும், மீறப்படுவதும் ஒரே நேரத்தில் அரங்கேறுகிறது. குறிப்பாக உழைப்பு சக்தி என்ற சரக்கிற்கு மற்ற சரக்குகளுக்கு இல்லாத ஒரு விசேட குணாம்சம் இருக்கிறது. ஆம், மற்ற சரக்குகளின் பயன் மதிப்பு என்பது ஒரு வரம்புக்குட்பட்டது. எனவே அதன் நுகர்வில் உச்சகட்ட எல்லை என்று உண்டு. ஆனால் உழைப்புசக்தி என்ற சரக்கில் அதன் நுகர்வு என்பது வரம்பிடப்பட்ட எல்லைக்குள் இருக்கக் கூடியதன்று.

அது படைக்கும் ஆற்றல் வளர்ந்துகொண்டே இருக்கும் தன்மையும் அத்துடன் படைக்கப்படும் சரக்குகளின் மொத்த மதிப்பும் கூடிக்கொண்டே போவதும் ஆன ஒரு சிறப்பியல்பு உழைப்புசக்தி என்ற சரக்கிற்கு உண்டு. உழைப்புச் சக்தி என்ற சரக்கிற்கின் இத்தகைய தன்மையை உணர்ந்து கொண்ட மூலதனம் பரிவர்த்தனை விதியை மீறாமலேயே அதே நேரத்தில் அது மீறப்படுவதால் கிடைக்கும் பலனை பெற்றுவிடுகிறது. இன்னொருபுறம் பரிவர்த்தனைவிதி மீறப்படும் அம்சத்தில் தனது உரிமைக்காக குரல் எழுப்பி நிற்கிறது தொழிலாளி வர்க்கம்.  முதலாளித்துவத் தோற்றத்திலிருந்து இன்றுவரை நடைபெற்ற வர்க்கப் போராட்டத்தை குறிப்பாக 1886 மே 1ந்தேதியிலிருந்து நடைபெற்றுவரும் போராட்டத்தையும் அது ஏன் இன்னும் முடிவுக்கு வராமால் நீடிக்கிறது என்பதையும் பார்ப்போம்.

இங்கிலாந்தில் முதலாளித்துவமும் தொழிற்புரட்சியும்:

இங்கிலாந்தில் முதலாளித்துவத்தின் தோற்றகாலமான 14ம் நூற்றாண்டிலிருந்து துவங்குவோம். பொதுவாக வேலை நேரத்திற்கு வரம்பிடும் சட்டங்கள் என்றால் அது குறிப்பிட்ட நேரத்திற்கு மேல் தொழிலாளர்களை வேலை வாங்கக் கூடாது என்று முதலாளிகளுக்கு கட்டளையிடும் சட்டம் என்று சடுதியில் நமது மண்டையில் தோன்றும். ஆனால் 14ம் நூற்றாண்டில், அதாவது மூன்றாம் எட்வர்டு காலத்தில் 1349ம் ஆண்டில் இங்கிலாந்தில் இயற்றப்பட்ட இந்தச் சட்டம், பிளேக் என்ற கொள்ளைநோய் ஏற்பட்டு ஏராளமானோர் மடிந்த நிலையில் வந்தது. இது 60 வயதுக்குட்பட்ட அனைவரும கட்டாயம் வேலை செய்ய வேண்டும் என்று கூறுகிறது. அதே நேரத்தில் தொழிலாளர்கள் பற்றாக்குறை காரணமாக சந்தையில் வேண்டல்-வழங்கல் விதி செயல்படும்போது ஏறும் உழைப்புச் சக்தியின் விலையை கூலியாகக் அவர்கள் கேட்கக் கூடாது என்றும் கூறுகிறது.

Britain 1926 General Strike: On the Verge of Revolution

அதேபோல் இவ்வளவு மணிநேரம்தான் வேலை நேரம் என்றும் அது கூறவில்லை. இதற்கடுத்தால் போல் அடுக்கடுக்காக வந்த தொழிலாளர் சட்டங்கள் அனைத்தும் கூலிக்கு வரம்பிடுவதும் தொழிலாளர்களின் இடப்பெயர்ச்சிக்கு வரம்பிடுவதும் செய்தது. எனினும் எதுவும் வேலைநேரத்திற்கு வரம்பிடுவது பற்றி கூறவில்லை. ஏழாம் ஹென்றி காலத்தில் அதாவது 1496ம் ஆண்டில்தான் வேலைநேரத்திற்கு வரம்பிடும் முதல் சட்டம் வந்தது. இச்சட்டப்படி வேலைநேரம் என்பது 15 மணிநேரம் ஆகும். இதற்குள் மூன்று வேளை உணவுக்கான நேரமும் அடங்கியதால் அது 12 மணியாக இருந்தது.

இதன் பிறகு பல்வேறு போராட்டங்கள் நடைபெற்றாலும் வேலை நேரத்தை குறைப்பதில் எந்த முன்னேற்றமும் இல்லை. ஆனால் 1562ம் ஆண்டு எலிசபத் மகாராணி காலத்தில் இயற்றப்பட்ட சட்டத்தில் சாப்பாட்டு நேரங்களை கோடையில் 2.5 மணியாகவும் குளிர்காலத்தில 2 மணியாகவும் குறைத்தது அதாவது வேலைநேரம் ஒரு மணிநேரம் நீடிக்கப்பட்டது. இந்த ஒரு மணிநேர நீட்டிப்பு என்பது 1833ம் ஆண்டுவரை நீடித்தது முதலாளிகளின் கடும் எதிர்ப்பையும் மீறி 12 மணிநேர வேலைநேரச் சட்டம் வந்தது.

தொழிற்புரட்சி – Back Bone

இதற்கிடையில் தொழிற்புரட்சி நடைபெற்று தொழிலாளர்களின் வேலை மும்முரம் கூட்டியதன் விளைவாக மீண்டும் தொழிலாளர்கள் போராட்டம் விசிறியடித்தது. இயந்திரங்களில் பணியாற்றும் தொழிலாளர்கள் இயந்திரத்தின் வேகத்திற்கேற்ப செயலாற்ற வேண்டியதிருந்தத்தால் அவர்கள் வேலை மும்முரம் கூடியது. அப்படியானால் அவர்கள் இழக்கும் சக்தியின் மதிப்பும் கூடும். ஏற்கனவே வேலை நாளையே அவசிய உழைப்பு நேரத்துடன் அதாவது கூலிக்கு இணையான மதிப்பை படைத்த நேரத்துடன் முடித்துக் கொள்ளாத மூலதனம் இன்னும் கூடுதல் மதிப்பை தொழிலாளியின் மும்முரத்தின் மூலம் பெற்று கைப்பற்றும் உபரி உழைப்பை இன்னும் அதிகரித்தது.

1833ம் ஆண்டுச் சட்டமானது, விடலைகள், குழந்தைகள், பெண்கள் ஆகியோரின் வேலைநாளைக் குறைத்தது. வேலைநாள் காலை ஐந்தரையிலிருந்து இரவு எட்டரை மணிவரை என்று 15 மணிநேரமாக இருக்கலாம் ஆனால் இதற்குள் 13-18 வயதுடையோரை 12 மணிநேரத்திற்குமேல் வேலை வாங்கக் கூடாது என்று அறிவித்தது. 9-13 வயதுக்குட்பட்ட குழந்தைகளை 8 மணிநேரத்திற்கு அதிகமாக வேலைவாங்கக் கூடாது என்றும் அறிவித்தது. இச்சட்டத்தில் 9-13 வயதுக்குட்பட்ட குழந்தைகளுக்கு இரவு நேர வேலை தடை செய்யப்பட்டது அதாவது இரவு எட்டரை முதல் காலை ஐந்தரைவரை வேலை வாங்கக் கூடாது என்றது. இச்சட்டத்திற்கு முதலாளிகள் தரப்பிலிருந்து எதிர்ப்பு கிளம்பியதால், சமரசமாக குழந்தைகள் என்பவர்களின் வயதை ஆண்டுக்காண்டு மாறுதல் செய்து பாராளுமன்றம் ஆனை பிறப்பித்தது.

இதன்படி 1834 மார்ச்சுக்குப் பின்னர் குழந்தைகளின் வயது 11 வரை என்றும், 1835 மார்ச்சுக்குப் பின்னர் குழந்தைகளின் வயது 12 வரை என்றும், 1835 மார்ச்சுக்குப் பின்னர் குழந்தைகளின் வயது 13 வரை என்றும் அறிவித்தது. குழந்தைப்பருவம் எது என்பதையும் அதன் உச்சகட்ட வயதையும் தீர்மானிக்கும் மானுடவியல் (Anthropology) விஞ்ஞானத்தை குப்பையில் போட்டுவிட்டு மூலதன நலனுக்காக செய்து கொண்ட சமரசம் எவ்வளவு கேலிக்கூத்தானது என்பதை இதன் மூலம் அறியலாம். ஆக நான்கு நூற்றாண்டுகால போராட்டத்திற்குப் பிறகு வேலைநேரம் ஆடவருக்கு 12 மணியாகவும் குழந்தைகளுக்கு 8 மணியாகவும் குறைக்கப்பட்டது எனினும் வேலைக்காக செலவிடும் நேரம் என்பது சாப்பாட்டு நேரங்களையும் சேர்த்தால் 15 மணி நேரம் என்பதையும் நினைவிற் கொள்ள வேண்டும்.

தொழிற்புரட்சி தோற்றுவித்த வேலை மும்முரம் அத்துடன் முதலாளித்துவ உற்பத்திமுறையில் துவங்கிவிட்ட காலவட்ட சுழற்சி முறையான நெருக்கடி அது ஏற்படுத்தும் வேலையின்மை இவைகள் எல்லாம் வர்க்கப் போராட்டத்தை வெளிப்படையாக நடைபெறும் நிலைக்குத் தள்ளிவிட்டது. இதன் வளர்ச்சிகட்டமே இங்கிலாந்தில் நடைபெற்ற மக்கள் சாசன இயக்கம். இவ்வியக்கம் 1838லிருந்து 1857 வரை நடைபெற்ற இயக்கமாகும். ஆறு கோரிக்கைகளை முன்வைத்து இயக்கம் துவங்கியது. இந்த ஆறு கோரிக்கைகளும் அரசியல் கோரிக்கைகளாகும்.

  • இருபது வயது நிரம்பிய அனைத்து ஆண்களுக்கும் ஓட்டுரிமை
  • ரகசிய வாக்கெடுப்பு முறை
  • பாராளுமன்ற உறுப்பினராவதற்கு எந்த சொத்து தகுதியும் தேவையில்லை
  • தேர்ந்தெடுக்கப்படும் பாராளுமன்ற உறுப்பினரின் வாழ்வாதாரத்திற்கான சம்பளம்
  • அனைத்து தொகுதிகளிலும் சம எண்ணிக்கையிலுள்ள வாக்காளர்கள்
  • ஊழலையும் அராஜகத்தையும் வேரறுக்க ஆண்டுதோறும் பாராளுமன்ற உறுப்பினருக்கான தேர்தல்

தொழிலாளி வர்க்க பேரெழுச்சி :

வர்க்க நலனைக் காக்க அரசியலை தெரிவு செய்வது என்பது தவிர்க்க முடியாதது. அரசுக்கு மகஜர் கொடுத்தால் பிரச்சனைகள் தீர்ந்தபாடில்லை. எனவே, அரசின் அங்கமாவது ஆகிப்பார்ப்போம் என்பதே அவர்கள் நிலை. இதைத்தான் சாசன இயக்கம் காட்டுகிறது. இதேபோல் 1848ல் ஃபிரான்ஸ் நாட்டிலும் லூயி பிலிப் அரசு தூக்கியெறியப்பட்டபின் தோன்றிய புதிய அரசில் தொழிலாளி வர்க்கத்திற்கு ஒரு அங்கம் கிடைத்தது. எனினும் அரசை முற்றிலுமாக கைப்பற்றாமல் வர்க்க நலனைப் பேணமுடியாது என்பது பின்னர் புரிந்தது.

அங்கே அடுத்த ஆறு மாதத்திற்குள் தொழிலாளி வர்க்கம் அரசு இயந்திரத்திலிருந்து விரட்டப்பட்டது. எனினும் வேலைநாளுக்கு 12 மணிநேர வரம்பை அக்கட்டத்தில் ஃபிரான்ஸில் சட்டபூர்வமாக்கப்பட்டது. இங்கிலாந்திலோ சாசன இயக்கம் கடைசிவரை வெற்றி பெறவில்லை. எனினும் 1867ம் ஆண்டின் அரசியல் சீர்திருத்தச் சட்டம் இவர்களின் கோரிக்கைகளை ஓரளவு ஏற்றுக் கொண்டது. ரகசிய வாக்கெடுப்புமுறை 1872ம் ஆண்டு அமலுக்கு வந்தது. ஓட்டாண்டியானாலும் பாராளுமன்ற உறுப்பினராகலாம். அவரை பராமரிப்பதற்கு சம்பளம் கொடுக்க வேண்டும் என்ற கோரிக்கை 1911ம் ஆண்டு நிறைவேறியது. எனினும் வயது வந்த ஆண்களுக்கு ஓட்டுரிமை என்பது 1918ம் ஆண்டுதான் கிடைத்தது.

New Chartist Movement (@JustinWalkerBCG) | Twitter

எனினும் சாசன இயக்கம் இங்கிலாந்தில் நடைபெற்ற வர்க்கப் போராட்டத்தின் ஒரு அங்கம் என்பதை யாரும் மறுக்க முடியாது. வேலை நேரக் குறைப்பு என்பது சாசன இயக்கத்தின் கோரிக்கைகளில் ஒன்றாக இல்லையென்றாலும், வேலை நாளை பத்து மணி நேரம் கொண்ட வேலைநாளாக்க வேண்டும் என்ற கோரிக்கை 1810ம் ஆண்டிலிருந்தே எழுப்ப்ப்பட்டு வருகிறது. 1810ம் ஆண்டில் இக்கோரிக்கையை எழுப்பிய ராபர்ட் ஓவன், ஒரு மாதிரி தொழிற்சாலையை நிறுவி அதில் 10 மணிநேரம் வேலை நாளாக அறிவித்தார். எனினும் இது நீடிக்கவில்லை. சாசன இயக்கம் வீறுகொண்டு எழுந்த பொழுது 1847ம் ஆண்டு 10மணிநேர வேலைநாளுக்கான சட்டம் கொண்டுவரப்பட்டது.

இச்சட்டம் 1848ம் ஆண்டு மே 1ந்தேதிமுதல் அமலுக்கு வந்தது. சாசன இயக்கத்தின் எந்த கோரிக்கையும் நிறைவேற்றப்படாவிட்டாலும் தொழிலாளிகளின் உரிமைகளை வென்றெடுப்பதில் முன்னேற்றம் காணப்பட்டது. முதலாம் அகிலம் என்றழைக்கப்பட்ட சர்வதேச் தொழிலாளர் சங்கம் 1866ம் ஆண்டு ஜெனிவாவில் நடத்திய மாநாட்டில் 8 மணி நேர வேளைநாளுக்கான தீர்மானம் நிறைவேற்றப்பட்டது. இது ஏதோ ஐரோப்பாவில் மட்டும் நடந்தது என்று முடிவெடுத்துவிடக் கூடாது. ஜெனிவா மாநாடு செப்டம்பர் 3-8 நடைபெற்றதென்றால் அதற்கு முன்பே அமெரிக்காவில் பால்டிமர் நகரில் நடைபெற்ற டங்கர்க் உழைக்கும் மக்கள் பேராயம் 8 மணி நேரத்திற்கான தீர்மானத்தை ஆகஸ்ட் 16ந்தேதியே நிறைவேற்றிவிட்டது. டங்கர்க் தொழிலாளர் பேராயமானது அமெரிக்காவிலுள்ள அனைத்து மாகாணங்களிலும் அந்தந்த அரசுகள் 8 மணிநேர வேலைநாளை சட்டமாக இயற்றவேண்டும் என்றது.

The Extension Buildings of the ADGB Trade Union School in Bernau ...

வட அமெரிக்காவின் மிகப்பெரிய தொழிற்சங்கமாக உருவெடுத்த ஃபெடரேஷன் ஆஃப் ஆர்கனைஸ்டு அண்ட் டிரேட் யூனியன்ஸ் என்ற அமைப்பானது மே 1, 1886 முதல் எட்டு மணி ரேத்திற்கு மேல் இச்சங்க உறுப்பினர்கள் பணியாற்ற மாட்டார்கள் என்று அறித்தது. அத்துடன் நாடுமுழுவதும் இதற்கான ஆர்பாட்டத்தை நடத்துமாறு உறுப்பு சங்கங்களுக்கு அறைகூவல் விடுத்தது. இதன் ஒருபகுதியாக நடைபெற்றதுதான் சிகாகோ எழுச்சி. அதன்வரலாறு பல கட்டுரைகளில் எழுதப்பட்டுவிட்டது. எட்டு மணிநேர வேலைநாளுக்கான போராட்டத்தில் சிகாகோ ஒடுக்குமுறையில் உயிரிழந்த அந்த உன்னதமான மனிதர்களுக்கு அஞ்சலி செலுத்தவே ஒவ்வொரு ஆண்டும் மே 1ந்தேதியை சர்வதேச தொழிலாளர் தினமாக அனுசரிக்க வேண்டும் என்று சர்வதேச தொழிலாளர் சங்கம் தீர்மானித்து இந்த முடிவுனது 1890முதல் இன்றுவரை அமல்படுத்தப்பட்டு வருகிறது.

இங்கிலந்தில் 1847ல் 10 மணிநேர வேலைநாள் சட்டம் கொண்டுவரப்பட்ட பொழுது முதலாளிகளிடம் கடும் எதிர்ப்பு நிலவிய சூழலில் அவர்களின் கோட்பாட்டு ஆசானாக விளங்கிய நாசா வீ சீனியர் என்ற பொருளாதார அறிஞர் கடைசி ஒரு மணிநேரத்தில்தான் முதலாளிகளுக்கு லாபம் கிடைக்கிறது என்று கூறும் ஆய்வுத்தாள் ஒன்றை வெளியிட்டார். இந்த ஆய்வுத்தாளில் கூறப்பட்ட வாதங்களை மார்க்ஸ் தன்னுடைய மூலதன நூலில் உடைத்தெறிந்திருக்கிறார். காகிதங்களில் இருதரப்பினர் சண்டைபோடுவது ஒருபக்கம் இருக்கட்டும். இன்று 134 ஆண்டுகள் கடந்த நிலையில் 8 மணிநேர வேலைநாள் என்பது எல்லா நாடுகளிலும் சட்ட பூர்வமாக்கப்பட்டுவிட்டது.

12லிருந்து பத்தாக குறைந்து பிறகு பத்திலிருந்து எட்டாக குறைந்துவிட்ட வேலை நாளில் நாசா வி சீனியர் கூறியபடி உலகில் முதலாளிகள் நஷ்டமடைந்தா வருகிறார்கள்? அவர்களின் செல்வம் பெருகவில்லையா? ஆக அவசிய உழைப்புநேரமும் உபரி உழைப்பு நேரமும் சேர்ந்ததே வேலை நாள் என்பதும். உபரி உழைப்பு முதலாளிகளுக்குச் செல்வதன் மூலம் செல்வம் பெருகுகிறது என்பதும் உள்ளங்கை நெல்லிக்கனியாவிட்டது. இன்று இதையும் தாண்டி ஃபிரான்சிஸ் 7 மணிநேர வேலைநாள் ஒருபகுதி தொழிலாளர்களுக்கும் ஸ்வீடனில் 6 மணிநேர வேலைநாள் என்பதும் நடைமுறைக்கு வந்துவிட்டது. இப்பொழுதும் முதலாளிகளுக்கு லாபம் கிடைக்கிறது. இது எப்படி சாத்தியபடுகிறது?

உழைப்பு நேரம்:

அவசிய உழைப்பு நேரம் என்பதும் அதன் சமதையான கூலி என்பதும் ஒரு தொழிலாளி தன்னை மறுஉற்பத்தி செய்துகொள்ள தேவைப்படும் சரக்குகளின் மதிப்புக்குச் சமம் என்று குறிப்பிட்டோம். தொழிலாளி மறு உற்பத்தி என்பது அவன் இறந்தபிறகு அவனை மாற்றீடு செய்ய அந்த இடத்தில் இன்னொரு தொழிலாளியை உருவாக்குவது, அதற்காக அவன் குடும்பமாக வாழ்வது குடும்பத்தின் தேவைகளைப் பூர்த்தி செய்வது மாற்றீடு செய்வதற்காக பெற்றெடுத்த  பிள்ளையை உழைக்க தகுதியானவனாக்குவது, தான் உழைத்து இழந்த சக்தியை மீட்டெடுத்து மறுநாள் உழைப்பிற்கு தயாரானவனாக்குவது உள்பட எல்லாம் அடங்கும். வர்க்கப் போராட்டத்தின் விளைவாக வரம்பிடப்பட்டுவரும் வேலை நாள் முதலாளியின் உபரியை குறைக்கும் என்பது உண்மைதான்.

அதே நேரத்தில் போட்டியில் ஈடுபடும் முதலாளித்துவத்தின் விளைவாக வளர்ந்துவரும் விஞ்ஞான தொழில்நுட்பம் அது ஏற்படுத்தும் உற்பத்தித்திறன் வளர்ச்சி ஆகியவை சரக்குகளை மலிவாக்கிவிடும். சரக்குகள் மலிவானால் தொழிலாளி மறுஉற்பத்தி செய்து கொள்ள தேவைப்படும் அவசியப் பண்டங்களின் விலையும் மலிவாகும் எனவே அவனது அவசிய உழைப்புநேரம் குறையும், இது முதலாளிக்காக செலவிடும் உபரி உழைப்பு நேரத்தை அதிகரிக்கும். இவ்வழியில் முதலாளிக்கு கிடைக்கும் அதிக உபரியை ஒப்பீட்டு உபரி என்றும் வேலை நாளை நீட்டிப்பதால் கிடைக்கும் உபரியை அறுதி உபரி என்றும் மார்க்ஸ் அழைக்கிறார். அறுதி உபரிக்கு முட்டுக்கட்டை ஏற்பட்டதால் ஒப்பீட்டு உபரி கிடைக்கிறது.

IE in Apparel Manufacturing–3: Work Measurement using Time Study ...

ஆக முதலாளித்துவமானது உபரியில்லாமல் வாழமுடியாது. இன்னொருபுறம் வேலைநாள் என்பது இரு வர்க்கங்கிடையிலான வர்க்கசக்திகளின் பலாபலன்களால் தீர்மானிக்கப்படுகிறது என்பதால் அது சில இடங்களில் 6 மணி என்றும் இன்னும் சில இடங்களில் 7 மணி என்றும் இன்னும் சில இடங்களில் 8 மணி என்றும் இன்னும் சில இடங்களில் அதற்கு அதிகமாகவும் இருக்கிறது. சட்டங்கள் அதுபாட்டு இருக்கும். எனினும் நடைமுறைப்படுத்தப்படுவது அந்தந்த வர்க்கங்களின் வலிமையைப் பொருத்ததே.

அறிவியல் தொழில்நுட்ப வளர்ச்சியால் உயர்ந்துவரும் தொழிலாளர்களது உற்பத்தித் திறன் உற்பத்திசெய்யப்படும் ஒவ்வொருபண்டத்திலும் அதிலடங்கியுள்ள உழைப்படர்த்தியை குறைப்பதாலும் ஒவ்வொரு பொருளிலும் அடங்கியிருக்கும் உழைப்பின் மதிப்பே பொருளின் மதிப்பாவதாலும் உற்பத்திப் பொருட்களின் மதிப்பு வீழ்ச்சியடைகிறது. அநாகரீக காலத்தில் தன்னை மறுஉற்பத்தி செய்து நிலைத்து நிற்க நாளொன்றுக்கு 24 மணிநேரம் உழைத்த மனிதன் இன்றைய நவீன அறிவியல்தொழில்நுட்ப உலகில் நாளொன்றுக்கு தனக்காக உழைக்க வேண்டிய நேரம் கணிசமாக குறைந்துவிட்டது. இதனால்தான் அது 18, 16, 15, 12, 10, 8, 6 மணிநேர வேலைநாள் என்று குறைந்துவிட்டது.

இன்னொருபுறம் முதலாளித்துவச் சுரண்டலின் தீவிரத்தன்மை அதிகரித்ததால் ஒப்பீட்டு உபரியையும் பெற்றுக்கொண்டு அறுதி உபரிக்காக வேலை நாளை நீட்டிக்கும் முயற்சியையும் மூலதனம் செய்கிறது. எல்லாவற்றையும் மூலதனமே தீர்மானிக்கும் என்ற நிலை இருக்கும் வரை இந்த நிலை மாறாது. 154 ஆண்டுகளுக்கு முன்பு சர்வதேச தொழிலாளர் சங்கம் நிறைவேற்றிய தீர்மானம் இன்னும் அமலாகாத பகுதிகள் இவ்வுலகில் உண்டு நம்நாட்டிலும் உண்டு. அதனால்தான் மேதினப் பொருத்தப்பாடு இன்னும் மறையவில்லை. மேதின தியாகிகளுக்கு செலுத்தப்படும் அஞ்சலி என்பது அவர்கள் எந்த கோரிக்கைக்காக போராடி உயிர்நீத்தார்களோ அந்த கோரிக்கையை வென்றெடுப்பதையே ஆகும். அத்துடன் 8 மணிநேர வேலை நேரம் என்பது அன்றைய தினத்தில் வளர்ந்திருந்த அறிவியல்தொழில்நுட்ப வளர்ச்சி மட்டத்திலும் அது கொண்டுவந்த உற்பத்தித்திறன் வளர்ச்சியிலும் சரியானது என்பதை நிரூபித்துவிட்டது.

SodaStream fires last Palestinian workers after permit row | The ...

இனிமேல் மேதினக் கோரிக்கை என்பது உற்பத்தித்திறன் வளர்ச்சியை கணக்கிட்டு அதன் மூலம் அவசிய உழைப்புநேரத்தை துல்லியமாக கணக்கிட்டு அதற்குத் தகுந்தாற்போல் வேலை நேரத்தை குறைப்பது என்பதாகவே இருக்க வேண்டும். இக்கோரிக்கை நிறைவேறினால் அறுதி உபரிமதிப்பு முற்றிலுமாக நிறுத்தப்பட்டு ஒப்பீட்டு உபரிமதிப்பும் நிரந்தரமாக ஒரு குறிப்பிட்ட சதவீதத்தில் நிறுத்தப்படும். இதை முதலாளித்துவம் அனுமதிக்குமா? அப்படி அனுமதித்தால் அதை முதலாளித்துவம் என்று கூறமுடியுமா? பெயர் எதுவாக இருந்தாலும் சரி, வேலைநாளை சமூகத்தின் சராசரி உற்பத்தித்திறனை வைத்து தீர்மானிக்கும் திசையில் மனித சமூகம் நடைபோடும் அந்தப்பயணத்தை துவக்கிய தினமே மேதினம் என்பது வரலாற்றின் பொன்னெழுத்துக்களில் பொறிக்கப்படும்.

எஸ்.விஜயன்

 

 

 

Article

மே தின சிறப்பு கட்டுரை: போற்றுதலுக்குரிய மே தினம்….. நமக்கான வரலாறு.. – எஸ். கண்ணன்

மே தினம் 1, உழைப்பாளர் தினம் உலகம் 8 மணி நேரம் என்பதை உழைப்பு நேரமாக தீர்மானிக்க வேண்டும், என்பதை...
Article

மே தின சிறப்பு கட்டுரை: மே நன்னாளை முதன்முதலில் கொண்டாடிய முன்னோடி – புலவர் வீரமணி

சிந்தனைச்சிற்பி சிங்காரவேலர் பலதுறைகளில் முன்னோடியாக விளங்கியவர். தமிழகத்தில் முதன் முதலில் டார்வினின் கொள்கையை விளக்கியவர் அவர்; உளவியலை முதன் முதலில்...
May Day
நூல் அறிமுகம்வரலாறு

மே தினத் தியாகிகளின் மகத்தான வரலாறு | வில்லியம் அடல்மன் | தமிழில்: ச. சுப்பாராவ்

1886 மே 4, செவ்வாய்க்கிழமை, இரவு சுமார் எட்டரை மணியளவில் சிகாகோவின் டெஸ்பிளெய்னஸ் தெருக்கு அருகேயுள்ள ஹேமார்க்கெட் சதுக்கத்தில் ஒரு...