Poetry

கவிதை: வாக்குமூலம் – ப.செல்வகுமார்

89views
Spread the love


வாக்குமூலம்
அவன் மரணத்துக்கு முன்
பேசிய இரண்டொரு வார்த்தைகள்
என்னிடம் தான் இருக்கின்றன
பெரும்பீதியுடனான
இமைமூடுவற்கு முந்தைய பார்வையோடும்
அவனது இறுதி மூச்சின் வெப்பத்தோடும்
தொண்டைக் குழியில்
மேலும் கீழுமாய்  உருட்டியபடியிருக்கிறேன்
கைமாற்றிவிட்டுப் போனவனின்
கடைசி சொற்கள்
உயிர்குமிழியென வடிவெடுத்து
பந்தினைப் போல்
மேலெழுந்து வந்து மிதக்கின்றன
துப்பவியலா உள்நாக்காய் வழிமறிக்கிறது வார்த்தைகளை
கவிழ்ந்த தலையையும்
மிதந்த விழிகளையும்
நினைவூட்டுகிற அவனது சொற்கள்
பிதுங்கிக் கொண்டு வெளியேறுமோவென்ற அச்சம்
நாவறளச் செய்கிறது
வழிதப்பிய குருதியோட்டமென
பீறிட்டலைகிறது
நதிமேல் தக்கையாய் மோதிமோதி
பிளவுகளால்
தாண்மையின் சுவருடைக்கிறது
பிஸ்டல் கெந்திய ரவைகளாய்
அசந்தர்ப்பமொன்றில்
என்னிலிருந்து வெளியேறிய
அந்த சொற்கள்
சொல்லி முடித்த கணத்தில்
செத்துப் போயிருந்தன.
   — ப.செல்வகுமார்


Leave a Response