Poetry

ச.அர்ஜூன்ராஜ் கவிதைகள் 



(i)விக்கல்:

காதல் மறதியில் 

தாப அசரீரி

உன் நினைவு தூபத்தின் இருப்பை 

மீட்டுணர்த்தும் தூண்டிலொலி

 

(ii)Hickey:

வலி ருசித்து

டோபமைனின் முதல் ஊத்தில்

நீ விண்டுண்டு எரித்த கலோரிகளின்

ஆஷ்ட்ரே 

 

(iii) காதுமடல்:

ஆதிக்கூச்சத்தில் பூத்த

அசடு சினுங்கும்

ஓரிதழ் அல்லிவட்டம்

 

(iv)மச்சம்:

உன் தேக ரகசியங்களின்

கடவுப்புள்ளி.

என் மார்பில் 

நீ ஒட்டிக்கொள்ள 

மோகமசி குழைத்து வார்த்த

மகரந்தப்பொட்டு

 

(v)கொலுசு:

ஓடி ஆடி வீடு நிறைக்கும் 

ஒலிக்கொலு

&

இணைவிழைச்சுனூடே 

கெண்டைக்காலில்

கெச்சட்டமெழுப்பும் 

ஜோடிக்குருவிகளின்

ஆதி கீச்சுகள்



(Vi) வியர்வை:

உடலோடிகள் 

ஒருவரையொருவர்

கடலாகிக்கொண்டு

உப்புக்குளிக்கும் 

உச்சவத்தின் குடமுழுக்கு.

◆◆◆◆◆◆

2) நான் நெருங்குவதை

உணர்ந்து கொண்டு

பட்டென பறந்துவிடும்

பட்டாம்பூச்சிக்கும் 

அவளுக்கும்

அந்த தொடுவானத்தின்

நிறமிகள்.

◆◆◆◆◆

3)

ஒரே குடையில்

இரண்டு மேகம்

கூடிப் பொழிகிறது

காதலை.

அப்பொழுதுதான்

மழை விட்டிருந்தது

அவர்களை தனியே.

◆◆◆◆◆

4)

நதியிலிருந்து

நழுவிக்கொண்டு

வருகிறாய் நீராடிவிட்டு

உன் உடலிலிருந்து

ஒழுகுகிறது

நதியின் கண்ணீர்.

=====×××===



Leave a Response