“பெண் ஏன் அடிமையானாள்?” – குப்பு. வீரமணி

0

1933-ல் ஈரோடு, பகுத்தறிவு நூற்பதிப்பு கழகம் லிமிட்டெட், முதல் பதிப்பாக பெரியார் எழுதி வெளியிட்ட “பெண் ஏன் அடிமையானாள்?” நூல், தற்போது மார்ச் 2018) தோழர் பசு கவுதமனின் விரிவுப்படுத்தப்பட்ட’ என்ற குறிப்புடன், பாரதி புத்தகாலய வெளியீடாக (12வது அச்சு வெளிவந்துள்ளது. 11-வது அச்சு இயல்பான பழைய நூலின் தொடர் பதிப்பாகவே பாரதி புத்தகாலயத்தினர் வெளியிட்டிருந்தனர்.
பிரசுரிப்போரின் முன்னுரையில், ‘இந்நூல் சுயமரியாதை இயக்க ஸ்தாபகர் பெரியார் ஈ. வே. ராமசாமி அவர்களால் பல சந்தர்ப்பங்களில் எழுதப்பட்டவைகளை திரட்டி வெளியிடுவதாகும்’ என்கிற குறிப்பு காணப்படுகிறது. 22.08.1926 தொடங்கி 18.01.1931 வரையிலான காலத்தில் குடி அரசு இதழ்களில் பிரசுரிப்போர் குறிப்புக்கிணங்க பல்வேறு சந்தர்ப்பங்களில் இக்கட்டுரைகள் வெளிவந்துள்ளன. நூலின் முதல் பதிப்பு 1933ல் வெளிவந்துள்ளது. இரண்டாம் பதிப்பு 1942ல் வெளிவரும்போது முகவுரை எழுதுகிறார் பெரியார். ‘… இதில் கண்ட விஷயங்கள் இதுவரை மக்களிடையே இருந்து வருகின்ற உணர்ச்சிகளுக்கும், ஆதாரங்களுக்கும், மனித சமூகக் கட்டுப்பாடு, ஒழுக்கம், ஆச்சாரம், மதக்கொள்கை, சாஸ்திர விதி என்பனவாகியவற்றுக்கும் பெரிதும் முரணாகவும், புரட்சித் தன்மை போன்ற தலைகீழ் மாறுபாடான அபிப்பிராயங்கள் கொண்டதாகவும், சாதாரண மக்களுக்கு காணப்படுமாதலால்… தக்க சமாதானம் சொல்லி மெய்ப்பிக்க வேண்டியிருக்கிறது. எனவே, அதற்காக முகவுரை என்னும் பேரால் சில வரிகள் எழுதுகிறோம், என்று குறிப்பிட்டுள்ளார்.
“நான் சொன்னால் உனக்கு ஏன் கோபம் வரவேண்டும் ?” என்கிற தலைப்பில் பெரியாரின் பல்வேறு கருத்துக்களை 5 தொகுதிகளாகத் தொகுத்து வழங்கிய தோழர் பசு. கவுதமன் தொடர்ந்த முயற்சியாக விரிவுபடுத்தப்பட்ட என்கிற குறிப்புடனான “பெண் ஏன் அடிமையானாள்? நூலை வழங்குகிறார்.
பெரியாரது கருத்துக்களை நுனிப்புல் மேய்ந்துவிட்டு மனம்போன போக்கில் விமர்சனங்களையும், வியாக்கியானங்களையும் அள்ளிவிடுகிற ஆய்வாளர்கள் ஒரு பக்கம், ‘இவரே சொல்லுகிறாரே, இல்லாமலா சொல்வார் ?’ என்று நம்பிக்கொண்டு அழுத்தம் திருத்தமாக பேசவும், எழுதவும் முற்படுகிறவர்கள் இன்னொரு பக்கம். அறிவியல் வளர்ச்சியும் பொது ஊடகங்களின் பெருக்கமும் இத்தகைய வரலாற்றுச் சிதைவுகளை மிக விரைவாகக் கொண்டு சேர்ப்பதால் பெரியார் பற்றிய உண்மையான தோற்றத்தை உரிய சான்றுகளுடன் நிறுவிட வேண்டியது அவசர, அவசியமாகிறது. நம்மாலானவரை அரிதின் முயன்று வரலாற்றுப் பிழைகளோ, தகவல் பிழைகளோ இல்லாமல், வருங்காலத் தலைமுறைக்கு பெரியாரை வழங்கிட வேண்டும் என்று எண்ணி செயல்படுவோர் வரிசையில் தோழர் பசு கவுதமனுக்கு ஒரு இடம் உண்டு. அந்த நோக்கில்தான், “ஈ.வெ.ராமசாமி என்கிற நான்…” என்று இரண்டு தொகுதிகளை வழங்கினார். பெரியார் என்ன எழுதினாரோ, வெளியிட்டாரோ அவற்றை அப்படியே பொருள் வாரியாக வகைபிரித்து தொகுத்து வழங்கி விடுகிற முயற்சி. அந்த வகையில் தான் “பெண் ஏன் அடிமையானாள்?” நூலின் பதிப்பும் விரிவுப்படுத்தப்பட்டதாக வழங்கப்பட்டுள்ளது.
நூல் தொகுக்கப்பட்ட வரலாறு மிக அவசியமானதாகும். பிரசுரிப்போர் கூற்றுப்படியே இந்தத் தலைப்புக்காக என்று எழுதப்பட்டவையல்ல, இந்தத் தலைப்பில் தொகுக்கப்பட்டவை. கட்டுரைகள், குடி அரசு இதழ்களில் வெளிவந்த நாள் விவரமும், கட்டுரைக்கு காரணமாக அமைந்த சில பின்னணிகளையும் சான்றாதாரங்களுடன் தொகுத்திருக்கிறார் பசு கவுதமன். திருச்சி சி.பி. இராஜகோபால் நாயுடு ‘விதவா விவாக விளக்கம்’ என்றொரு நூலை எழுதி பெரியாரிடம் முன்னுரை வேண்டி அனுப்புகிறார். போதிய கால அவகாசமின்மையால் முன்னுரை எழுத முடியாமல் போக 22.8.1926 குடி அரசு இதழில் அந்த நூலுக்கான மதிப்புரையாக பெரியார் எழுதிய ‘விதவைகளின் நிலைமை என்ற கட்டுரைதான் இந்த அருமுயற்சிக்கு வித்தாகிறது. தொகுப்பில் 7வது அத்தியாயம்

1928-ல் ‘கற்பு’ என்ற கட்டுரையை ‘சித்திர புத்திரன் என்ற பெயரில் எழுதி வெளியிடுகிறார். “கோவில்பட்டி ஸ்ரீமான் P.R. பரமசிவ முதலியார் எழுதுவது” என்று கற்பும் – சித்திர புத்திரனும் ஓர் மறுப்பு என்று எழுதப்பட்ட மறுப்பு கட்டுரையும் 22.01.1928 குடி அரசு இதழில் வெளியிடப்படுகிறது. இத்தகைய எதிர்வினைகளை பெரிதும் மதிப்பவரும், இவற்றால் ஊக்கம் பெறும் இயல்பினருமான பெரியார் இம்மறுப்புக்கு சமாதானம் அடுத்த வெளியீட்டில் சித்திர புத்திரன் வெளியிடுவான்’ என்று கட்டியம் கூறிவிட்டு, ‘வள்ளுவரும் கற்பும் என்ற சமாதானத்தை எழுதுகிறார். (தொகுப்பில் இரண்டாம் அத்தியாயம்)

அவ்வாறே, 5.10.1930 மணவிழா நிகழ்வொன்றில் பெரியார் ஆற்றிய உரை, கல்யாண விடுதலை என்ற கட்டுரைக்கு பின்னணியாக அமைந்து மறுமணம் தவறல்ல என்றும் மலர்ந்துள்ளது.
நூல் வெளியிடப்பட்ட காலம் (1933) குறித்தும், வெளியீட்டு நிறுவனம் குறித்துமான பதிவுகளுக்கு குடி அரசு இதழ்களில் வெளிவந்த விளம்பரங்களையும் செய்திகளையும் சான்றாதாரங்களாக முன்வைத்து உறுதி செய்கிறார். பெரியாரின் பதிப்பு முயற்சிகள் குறித்த வரலாறு எளிதானதன்று. மிகுந்த தன்னம்பிக்கையுடன் மேற்கொள்ளப்பட்ட இமாலய சாதனை. ஒரு நூறாண்டு கூட நிறைவுறாத கால இடைவெளியில் வெளியாகும் பிழையான தகவல்கள் தான் கவலை தருகின்றன.
12.02.1933-ல் எழுதப்பட்ட சந்தேக நிவர்த்தி யில் பகுத்தறிவு நூற்பதிப்புக் கழகம் (என்பதாக ஒரு கம்பெனியை நடத்த ஏற்பாடு செய்து…. என்று காணப்படுகிறது. இந்த நூற்பதிப்பு கழகம் லிமிட்டெட் ரிஜிஸ்டர் செய்யப்பட்டிருக்கின்றது. வாசகர் பரப்பையும், பதிப்பிக்க உத்தேசித்துள்ள பதிப்பித்த நூல்களையும், பதிப்பக குறிக்கோளையும் கருத்தில் கொண்டு சிந்தித்தால் மட்டுமே பகுத்தறிவு நூற்பதிப்புக் கழக லிமிட்டெட் முயற்சியின் முழுப்பரிமாணமும் விளங்கும். பெரியார் தவிர வேறுயாருக்கும் இத்தகைய துணிவு வரவே வராது என்று அறுதியிட்டு கூறமுடியும். தோழர் பசு. கவுதமனும் பதிப்பகம் குறித்த இன்றியமையாத தகவல்களை உரிய சான்றாதாரங்களுடன் பதிவு செய்துள்ளார். அவ்வாறு நமக்குக் கிடைக்கும் செய்திகள் நாம் பயணிக்க வேண்டிய பாதையை சுட்டிக் காட்டுவனவாகவே கருதுகிறோம்.
12.02.1933 ‘குடிஅரசு’ வில் சந்தேக நிவர்த்தி கட்டுரை வாயிலாக பதிப்புக் கழக நிலைப்பாட்டை தெளிவு செய்கிறார். பெண் ஏன் அடிமையானாள்? நூல் வெளியீடு குறித்த 10.09.1933, 17.09.1933 நாளிட்ட விளம்பரங்கள் பதிப்புக் கழகம் செயல்பட்டுள்ளதை தெளிவு செய்கின்றன. மிகக் குறுகிய காலத்தில் பல அரிய நூல்கள் பதிப்பிக்கப்பட்டதான குறிப்பையும் மொழி பெயர்ப்பு நூல்களை பதிப்பித்தது பற்றியும் பதிவு செய்துள்ளார். முயன்று அந்த நூல்களை சேகரிக்கக் கூடுமானால் பெரும்பயன் விளையும். அரிய சாதனையாகக் காணப்பெறும் பகுத்தறிவு நூற்பதிப்புக்கழக முயற்சிகள் – பணிகள் மேலும் பல வரலாற்றுத் தகவல்களை வழங்கிடக் கூடும்.
தான் மேற்கொண்டிருக்கும் பணி குறித்த மதிப்பீடும், மற்றவர்களது தயக்கத்தையும், அவற்றை நீக்க மேற்கொள்ளும் பொறுப்புமிக்க அணுகுமுறையும், கொண்ட கொள்கையில் தீவிர முயற்சி கொண்ட பெரியாரிடம் ஒருங்கே அமைந்திருந்ததை அவரது உரைகள், நூல்கள் அனைத்திலுமே காணலாம்.
”…… சுயமரியாதை இயக்கமும் அது சம்பந்தமாய் நடைபெறும் பிரச்சாரமும் வெளியிடப்படும் பிரசுரங்களும், இது சமயம் பலருக்கு அரசியல் சம்பந்தமுடையதாகக் காணப்டுகின்றதுடன், அரசியல் அடக்குமுறைக்கு ஆளாக நேரிடுமோ என்ற அச்சமும் ஏற்பட்டிருப்பதாகத் தெரிகிறது. ஆதலால் அவ்வித சந்தேகமும், பயமும் இல்லாமல் இருப்பதற்கு அதாவது பகுத்தறிவு விளக்கம் என்பது யாவருக்கும் பொதுவானது என்பதோடு, மக்களுக்கு பகுத்தறிவு ஏற்படுத்த யாவரும் பிரவேசித்து தங்களால் கூடிய உதவி செய்வதற்கு தகுதியுடையதாயும் ……” என்று தெளிவு படுத்தியுள்ளார்.
பகுத்தறிவுக் கொள்கைகளை அறிவது, கைக்கொள்வது, வாய்ப்பானால் பிரச்சாரம் – செய்வது ஆகியன் வேறு. அரசியன களத்தில் உரிய மாற்றங்களை விளைவிக்க, உரிமைகளை – உரிய சட்டப் பாதுகாப்புக் கூறுகளைப் பெற பணியாற்றுவது வேறு. இந்த நிலைப்பாட்டில்தான் சுயமரியாதை இயக்கப் பணிகளைக் கொண்டு சென்றார் பெரியார் என்பதை அவரது வரலாறு நெடுகிலும் காணலாம். சுயமரியாதை பிரச்சாரம் என்பதும் இயக்கம் சார்ந்த அரசியல் பணிகள் என்பதும் இணைகோடுகளாக தொடருமாறு பார்த்துக் கொண்டார். கருத்துத் தெளிவும் உறுதியும் பெறுபவர்கள் களப்பணிக்கு வருவர். களப்பணியில் எவ்வித அடக்குமுறையும் இடையூறும் அவர்களை அசைக்காது. எண்ணிப் பார்த்தாலே குலைநடுங்கச் செய்யும் கொடுமையான துன்பங்களை எதிர்கொண்டு போராடிய, மறைந்த இயக்கத்தொண்டர்களை உருவாக்க பெரியாரால் எப்படி முடிந்தது? என்கிற வினா, ஆழ்ந்து பயிலத்தக்கது. தண்டனை இவ்வாறிருக்கும் என்று நன்குணர்ந்த தொண்டர்கள் பட்டியலை போராட்ட வீரர்களாக முன்னரே அச்சுப்போட்டு அறிவிக்கிற நெஞ்சுரம், முன்னரே கைது செய்யப்பட்டாலும் திட்டமிட்ட போராட்டம் சுணக்கமின்றி தொடர அடுத்த படை அணி, சிறை புகுந்த போதும் எதிர் வழக்காடவோ, பிணை கோரவோ, மன்னிப்பு வேண்டவோ, மண்டியிடவோ, முன்வராத கொள்கைத் தெளிவு ……. என்று எண்ணிப் பார்த்தால் மட்டும்தான் சுயமரியாதை பிரச்சார இயக்க வரலாற்றுப் பெருமை மட்டுமல்ல, தேவையும் கூட நன்கு விளங்கும்.
தோழர் பசு. கவுதமனின் விரிவுப்படுத்தப்பட்ட பெண் ஏன் அடிமையானாள்?’ நூலினை ஆராய்ந்து முயன்று சேகரிக்கப்பட்டுள்ள தகவல்களை ஒரு நல்ல தொடக்கமாகக் கொண்டு மேலும் பயணப்பட வேண்டும். பெரியார் கலப்படமில்லாமல் வழங்கப்பட வேண்டும் என்பதில் மட்டும் நமக்கு உறுதியும், தெளிவும், சமரசமில்லாத முயற்சியும் இருந்தால் போதும். அதுவே கூட பகுத்தறிவு பிரச்சாரப்பணிக்கு நாம் செய்யக் கூடிய சிறந்த தொண்டுதான். தொடரும் தலைமுறை அதனை கையில் எடுத்துக் கொள்ளும். பல தளங்களில் பெரியாரின் கொள்கைகள் இயல்பாக ஏற்கப்பட்டுள்ளதை நடுநிலையாளர்கள் மறுக்கமாட்டார்கள். கர்ப்பத்தடை, ஒன்று போதும். அதிர்ந்து, நிலை குலைந்து, அரற்றியவர்கள் வரலாற்று வரிகளாக எஞ்சியதும், சிறு குடும்பநெறி ஏற்கப்பட்டுள்ள இன்றைய நடைமுறையும் போதாதா? சட்டரீதியாக பல மாற்றங்கள் பெண்களின் வாழ்வை மேம்படுத்த உருவாகியுள்ளன. பெரியார் மண்ணின் விளைச்சலே அவை என்று உறுதியாகக் கூறமுடியும்.
“அரளியிலே அரைத்து வைத்த துவையலாக’ பெரியாரின் பெண் விடுதலைக் கருத்துகள் உணரப்படுவது இயல்புதான். குழந்தைகள் தூங்குவதுபோல் வேஷம் போட்டுக் கண்களை மூடிக் கொண்டிருந்தால், பெரியவர்கள் குழந்தைகளின் தூக்கத்தை பரிசோதிப்பதற்காக தூங்கினால் கால் ஆடுமே’ என்று சொன்னால், அந்தக் குழந்தை தன்னை தூங்குவதாக நினைக்க வேண்டுமென்று கருதி காலைச் சிறிது ஆட்டுமே அது போலும், எப்படிப் பெண்கள் தங்கள் கால் விரல்களைப் பார்த்து நடப்பதுதான் கற்பு என்றால், பெண்கள் அது போலெல்லாம் நடப்பதுபோல் நடித்துத் தங்களைக் கற்பு உள்ளவர்களென்று காட்டிக் கொள்கிறார்களோ அதுபோலும் … என்று தொடருகிறது காதல் குறித்த கட்டுரை. “காதலையும் சற்று பார்த்து விடலாம் என்றே இதைப்பற்றி எழுதலானோம்” என்கிறார் பெரியார்.
மனித சுபாவத்தையும், இயற்கைத்தன்மையையும் கருத்தில்கொள்ளாமல் செயற்கையான நடைமுறைகளை மேற்கொண்டு வாழ்க்கையை சிக்கலாக்கிக் கொண்டு ஒட்டுமொத்த மனித சமுதாயத்தையும் முடக்கிப் போட்டுள்ள சூழலுக்கு எதிரான பெரியாரின் போர்முறைக்கு சிறிய எடுத்துக்காட்டுதான் காதல் கட்டுரையிலிருந்து சுட்டப்பட்ட பகுதி. மனிதகுல வளர்ச்சியில் மேம்பாட்டில், பெரியார் கொண்டிருந்த மட்டற்ற பற்றையும், அதன்வழி வெளிப்படுத்திய மதிப்பு மிக்க கருத்துக்களையும், அவற்றை நடைமுறைப்படுத்த உருவாக்கிய வழிமுறைகளையும், ஒருசேர விளங்கிக்கொள்ள வழிவகுக்கும் சிறு அரிய நூல் தொகுப்பு ‘பெண் ஏன் அடிமையானாள்?” அதனை மேலும் பயன்மிக்கதாக்கி வழங்கியுள்ள தோழர் பசு. கவுதமனின் அருமுயற்சி பாராட்டத்தக்கது.
 புத்தகம் வாங்க https://thamizhbooks.com/pen-een-adimaiyaanal-2851.html

Share.

About Author

Leave A Reply